PNS香港再定位

笑言調查報道為同事帶來麻煩 明報忠實讀者林鄭:仍值重視尊敬


特首林鄭月娥(右)噚日主禮《明報》舉辦嘅論壇時,同世界華文媒體有限公司主席張翼卿(左)握手,林太致辭時提到自己係忠實讀者;並話《明報》近年揭秘、調查式報道為佢嘅同事「帶嚟一啲麻煩」,但仍值得重視同尊敬。(鄧宗弘攝)


【明報專訊】行政長官林鄭月娥噚日出席《明報》舉辦嘅論壇時提到,自己係《明報》忠實讀者,由中學時間已經開始睇。佢話《明報》近年揭秘式、調查式嘅報道為佢嘅同事「帶嚟一啲麻煩」,但仍值得重視同尊敬。

前日先話過去一個月馬不停蹄出訪,令佢感到有啲勞累嘅林鄭月娥,噚日出席《明報》「香港再定位」高峰論壇致辭時話,一般嚟講,如果有機構有重大活動,特首辦嘅處理方式係喺幾個活動中揀一個,否則時間難以分配,但佢為咗慶祝《明報》今年創刊60周年,就至少參加咗《明報》3個活動,包括出席噚日論壇、將會出席5月20日嘅大型報慶酒會,同埋寫咗一份賀辭,仲叫在場其他傳媒機構「唔好呷醋」。

林太透露,自己係《明報》忠實讀者,由中學已經開始睇,差唔多從不間斷,更特別提到《明報》近年一啲「求真、求是、揭秘式、調查式嘅報道」,為佢嘅同事「帶嚟一啲麻煩」,但對於「呢個傳媒」,佢覺得係值得重視同尊敬。

見特首都認係忠實讀者,香港中華總商會會長蔡冠深都公開話自己都係《明報》讀者,亦都係中學時代已經睇,不過就同林太唔一樣,話《明報》「冇為我帶嚟麻煩」,但佢一樣都睇緊,又期望《明報》持平同埋公信力可以繼續加強。